Zamani sana waliishi katika mji mmoja ndugu wawili ambao tabia zao mbaya ziliwaletea matatizo mengi. Siku baada ya siku walizidi kuzama katika madeni. Wadai wao hawakuwapa amani, kwa hiyo mwishowe wakakimbilia msituni. Wakawa wanyang'anyi wa barabarani.
Lakini hawakuwa na furaha. Akili zao zilisumbuliwa na matendo yao maovu. Mwishowe wakaamua kurudi nyumbani, kulima shamba kubwa, na kulipa madeni yao kidogo kidogo.
Kwa hiyo wakaanza kazi na punde wakawa na shamba zuri kabisa lililoandaliwa kwa mahindi. Kwa kuwa udongo ulikuwa mzuri, walitumaini mavuno yangewaletea pesa nyingi.
Kwa bahati mbaya, siku ileile kwale mmoja akapita. Akiwa na njaa, akafukua mbegu zote zilizopandwa karibuni na kuzila.
Ndugu wawili maskini, walipofika shambani siku iliyofuata, walihuzunika kukuta kazi yao yote imepotea bure. Wakamtegea mwizi mtego. Jioni ile kwale akanaswa ndani yake. Ndugu wawili, walipokuja na kumkuta ndege, wakamwambia kwamba sasa madeni yao yote yangehamishiwa kwake kwa sababu alikuwa amewaibia njia ya kulipa madeni wenyewe.
Ndege maskini, akiwa katika taabu kubwa kwa kutwikwa mzigo kama huo, akajenga kiota chini ya msufi. Pale akaanza kutaga mayai, akikusudia kuyaangua na kuwauza ndege wachanga ili apate pesa za kulipa deni.
Hata hivyo, kimbunga kikali kikaja, na tawi la mti likaanguka. Mayai yote yakapasuka. Kwa sababu hiyo, kwale akahamishia madeni kwa mti, kwa kuwa ulikuwa umevunja mayai.
Msufi ulihuzunika kubebeshwa kiasi kikubwa namna hiyo cha pesa za kulipa. Mara moja ukaanza kazi ya kutoa sufi nyingi kadiri ulivyoweza, ili uiuze.
Tembo mmoja, bila kujua yote yaliyotokea, akapita. Alipoiona sufi, akaja kwenye mti na kuchuma mazao yake yote. Kwa njia hii madeni yakahamishiwa kwa tembo maskini.
Tembo alihuzunika sana alipogundua alichokifanya. Akatangatanga hadi jangwani, akiwaza njia ya kupata pesa. Hakuweza kuipata hata moja.
Alipokuwa amesimama kimya chini ya mti, mwindaji maskini akanyemelea. Mtu huyu akadhani amepata bahati kubwa kumkuta tembo mzuri namna hiyo amesimama kimya kiasi hicho. Mara moja akampiga risasi.
Kabla tu ya mnyama kufa, akamwambia mwindaji kwamba sasa madeni yangelazimika kulipwa naye. Mwindaji alihuzunika sana aliposikia hivyo, kwa kuwa hakuwa na pesa hata kidogo.
Akatembea kurudi nyumbani akijiuliza angefanya nini ili apate pesa za kutosha kulipa madeni. Gizani hakuona kisiki cha mti ambacho wasimamizi walikuwa wameukata barabarani. Akaanguka na kuvunjika mguu. Kwa njia hii madeni yakahamishiwa kwa kisiki cha mti.
Bila kujua hilo, kundi la mchwa likapita asubuhi iliyofuata na kuanza kuula mti. Walipokuwa wameuvunja karibu hadi ardhini, mti ukawaambia kwamba sasa madeni ni yao, kwa kuwa walikuwa wameuua.
Mchwa, wakiwa na hekima sana, wakafanya baraza pamoja kutafuta njia bora ya kupata pesa. Wakaamua kila mmoja achangie kadiri awezavyo. Kwa mapato hayo mmoja wa vijana wao angekwenda soko la karibu kununua uzi safi wa kitani. Wangeufuma na kuuza na faida ingesaidia kulipa madeni.
Hili likafanyika. Mara kwa mara kitani chote kilichokuwa ghalani kililetwa na kutandazwa juani ili kibaki katika hali nzuri. Watu wanapokiona kitani hiki kimetandazwa juu ya vichuguu, hukiita 'uyoga,' na kukikusanya kwa chakula.