Katika siku za kale wanyama wote wa ulimwengu waliishi pamoja kwa urafiki. Hawakuwa na mtu wa kuwatawala na kuwahukumu. Matokeo yake, matendo mengi maovu sana yalikuwa yakifanyika kila mara, kwa kuwa hakuna aliyehitaji kuogopa adhabu yoyote.
Mwishowe wote wakakutana pamoja kujadili hali hii mbaya, na, kutokana na hilo, wakaamua kuchagua mfalme. Shida kubwa ilikuwa jinsi ya kumchagua.
Simba ndiye mnyama wa kwanza aliyependekezwa. Lakini wote walimpinga kwa sababu, walisema, alikuwa mkali mno. Mbwa Mwitu akatajwa baadaye, lakini kondoo na mbuzi walikataa awe mfalme kwa sababu alikuwa adui yao. Walijua wangetendewa vibaya kama angechaguliwa.
Kwa kuwa haikuwezekana kumridhisha kila mtu kwa uchaguzi, wakaamua kwa njia nyingine. Umbali wa maili mbili kulikuwa na kigoda kikubwa, kilichowekwa chini ya mti wa kale sana ambao waliamini kuwa makao ya baadhi ya miungu yao. Wangefanya mashindano makubwa ya mbio. Mnyama ambaye angefika kwanza na kuketi juu ya kigoda angechaguliwa kuwa mfalme.
Siku ya mashindano ikafika. Wanyama wote, wakubwa kwa wadogo, wakajiandaa kushiriki. Ishara ilipotolewa, wakaanza mbio. Sungura, akiwa mkimbiaji hodari sana, akawaacha wengine nyuma upesi. Alifika kwenye kigoda akiwa mbele ya mnyama aliyefuata kwa yadi mia tano kamili. Unaweza kukisia hasira yake wakati, alipokuwa karibu kuketi, sauti ilitoka kwenye kigoda ikisema, "Jihadhari, Bwana Sungura, jihadhari. Nilifika hapa kwanza." Huyu alikuwa kinyonga. Yeye, kwa kuweza kubadilisha rangi yake ilingane na mazingira yake, alikuwa ameushika mkia wa Bwana Sungura mara tu mbio zilipoanza. Kwa kuwa aliifanya rangi yake ilingane na ya sungura, hakuna aliyemwona. Alikuwa ameshikilia kwa nguvu sana, na sungura alipogeuka kuketi, Kinyonga akaachia na kutua juu ya kigoda.
Sungura akaona jinsi alivyohadaiwa na akakasirika sana. Hata hivyo, wanyama wengine wakafika kabla hajamdhuru kinyonga. Kwa mujibu wa makubaliano waliyokuwa wameweka, hawakuwa na jinsi ila kumfanya Kinyonga mfalme.
Lakini hakuna hata mmoja wa wanyama aliyeridhika na uchaguzi huo. Kwa hiyo mara tu mkutano ulipokwisha, wote wakatawanyika kila upande na kumwacha Kinyonga peke yake kabisa.
Aliona aibu mno hadi akaenda kujenga makao yake juu kabisa ya mti mrefu sana mlimani. Usiku wa manane unaweza kumsikia akiwaita watumishi wake waje wakae naye. Lakini ameachwa peke yake kabisa. "Mfalme asiye na raia si mfalme."