.png?ngsw-bypass=1)
Hapo zamani za kale katika kijiji fulani aliishi mwanamume na mke wake ambao hawakuwa na mtoto. Siku moja, hata hivyo, mume alipokuwa ameenda kuwinda, mwanamke akazaa mtoto wa kiume. Alihangaika sana kwa kutokuwepo kwa mume wake, kwa sababu hakuweza kumjulisha kuhusu kuzaliwa kwa mtoto. Katika nchi ile ni desturi kwa baba kumpa mtoto jina akiwa na umri wa wiki moja. Wakati wa kumpa jina ulipokaribia, mwanamke akajiuliza moyoni ni jina gani angempa mtoto kama mume wake asingerudi kwa wakati. Kwa mshangao wake, mtoto mwenyewe akajibu, "Jina langu ni Quarcoo Bah-boni." Kwa kuwa alikuwa na umri wa wiki moja tu alistaajabu kumsikia akiongea. Siku iliyofuata alipata mshangao mkubwa zaidi. Alikuwa akinung'unika kwa sababu mume wake hakuwepo kwenda shambani kwa ajili yake kuleta chakula. Mtoto akatangaza, "Nitakwenda shambani," na akafanya hivyo.
Alipokuwa na umri wa wiki chache, siku moja mama yake alikuwa na shughuli nyingi sana. Akamlaza kitandani huku akiendelea na kazi yake. Baada ya dakika chache wavulana kadhaa wakamjia wakiwa na hasira kubwa. "Mwanao amekuwa akitupiga na kututendea vibaya barabarani," wakasema. "Mwanangu!" akalia. "Mbona, mwanangu ni mtoto mchanga tu. Amelala usingizi kitandani mwangu." Ili kuwathibitishia akaingia ndani kuwaonyesha mtoto. Wazia mshangao wake hakuonekana popote! Ilimbidi awaombe wavulana radhi na kuwasihi wamsamehe mtoto. Muda mfupi baadaye, akaingia na kujilaza kitandani.
Aliendelea na hila hizi za utundu hadi mama yake hakuweza kuzivumilia tena. Kwa hiyo akamfukuza nyumbani na kumkataza asirudi. Akaondoka kwa furaha kubwa.
Baada ya kutembea maili chache, akafika kwenye jengo ambamo mbuzi, mbwamwitu, simbamarara, simba, na tembo waliishi pamoja kwa furaha sana. Wanyama hawa wote walikuwa wameketi kuzunguka moto wao alipokaribia. Baada ya maneno mengi ya adabu, akawaomba ruhusa abaki na kuwa mtumishi wao, kwa kuwa hakuwa na mama. Wanyama, baada ya mjadala mfupi, wakakubali, wakidhani kwamba angeweza kuwasaidia kwa njia nyingi. Akapewa kiti na chakula, alichokula kwa hamu kubwa.
Wanyama hawa watano kwa kawaida walipokezana kwenda shambani kwao maili chache kutoka pale kila asubuhi, kuleta nyumbani chakula cha siku. Ilipokuwa zamu ya Mbuzi, akamwomba Quarcoo aende naye kubeba mzigo wa kurudi.
Kwa hiyo kikapu kikakabidhiwa kwa mvulana mdogo naye akamfuata mbuzi kwa unyenyekevu. Walipofika shambani, Quarcoo akaweka chini kikapu na kukimbia kwenda kucheza. Hakujali hata kidogo miito ya mbuzi ya kuomba msaada, bali aliendelea kucheza kimya. Mwishowe mbuzi alikasirika sana hivi kwamba akamwendea Quarcoo na kumpiga makofi masikioni. Kwa mshangao wake mkubwa, mvulana akampiga pigo kubwa hivi kwamba akaanguka chini. Kisha Quarcoo akaendelea kumpiga hadi akalia kuomba huruma. Wala hakuacha kumpiga hadi mbuzi alipoahidi kumaliza kazi, kubeba mzigo nyumbani, na kutomwambia mtu yeyote kilichotokea. Baada ya kuahidi hili, mbuzi akaachiliwa. Kufikia wakati huu uso wa mnyama maskini ulikuwa na michubuko na umevimba.
Wakati wa kwenda nyumbani ulipofika mbuzi ilimbidi afunge mzigo na kuubeba kichwani. Kisha wakaanza safari.
Mara tu walipoona nyumba yao ndogo kwa mbali, Quarcoo akachukua kikapu kutoka kwa mbuzi na yeye mwenyewe akakibeba hadi ndani ya nyumba.
Wanyama wengine wote wakashangaa walipoona uso wa mbuzi, na wakamuuliza ilitokeaje. "Nilikuwa na bahati mbaya ya kuingia katika kundi la nyuki nilipokuwa nikifanya kazi. Waliniuma," akajibu mbuzi maskini.
Siku iliyofuata ilikuwa zamu ya mbwamwitu kwenda shambani. Naye pia akarudi akiwa na michubuko mingi na amevimba. Mbuzi (akikisia kilichotokea) akasikiliza kwa tabasamu visingizio alivyotoa Mbwamwitu kwa wengine.
Baadaye Mbuzi na Mbwamwitu wakalizungumza jambo hilo na kustaajabu sana nguvu za mvulana mdogo.
Kila siku mnyama mwingine alichukua zamu yake shambani, na kila siku alirudi katika hali ileile kama rafiki zake. Mwishowe wanyama wote walikuwa wamekwenda, na sasa wote wakakusanyika pamoja kujadili jinsi bora ya kumwondoa Quarcoo Bah-boni.
Wakaamua kwamba, asubuhi na mapema siku iliyofuata, wangeondoka pamoja na kumwachia mvulana nyumba. Wakaandaa kikapu kikubwa cha chakula na kukiweka tayari.
Kwa bahati mbaya kwao, Quarcoo alikuwa amesikia mjadala wao na akaamua kwamba naye angeenda nao. Kimya akajipatia jani kubwa, akajizungushia (kwa kuwa alikuwa mdogo sana) na kujilaza ndani ya kikapu cha chakula.
Alfajiri wanyama wakaamka kimya sana. Mbuzi, akiwa mdogo kuliko wote, akapewa kikapu kubeba. Wakaanza safari, wakishukuru sana kumkimbia mvulana msumbufu bila kuota hata kidogo kwamba walikuwa wamembeba pamoja nao.
Walipokuwa wametembea umbali wa kutosha Mbuzi, akihisi joto jingi na uchovu, akaketi kupumzika kwa muda mfupi. Mara tu wengine walipotoweka machoni, akafungua kikapu, akikusudia kula chakula kidogo bila rafiki zake kujua. Hata hivyo, tamaa yake ikalipwa kwa pigo la kutisha usoni. Kisha akasikia maneno, "Funga kikapu mara moja, na usiwaambie wengine lolote." Akatii na kuwafuata wengine kwa haraka akimwogopa mvulana huyu wa kutisha.
Mara tu alipowafikia akaita, "Mbwamwitu, Mbwamwitu, sasa ni zamu yako kuchukua kikapu. Nimechoka sana." Mbwamwitu akachukua mzigo mara moja.
Hawakuwa wameenda mbali Mbwamwitu alipoanza kufikiria vitu vyote vizuri vilivyokuwa kikapuni naye pia akasema angepumzika kidogo kivulini. Baada ya kuwaondoa wengine kwa njia hii, akafungua kikapu kwa haraka. Akakaribishwa na Quarcoo kwa njia ileile kama Mbuzi, naye upesi akafunga kikapu na kuwafuata wengine. Kwa njia hii kila mnyama alipata zamu yake ya kubeba kikapu, na kila mmoja aliadhibiwa kwa tamaa yake.
Mwishowe, ikafika zamu ya Tembo. Alipowafikia wengine tena na kuomba mtu ampokee mzigo wake wakalia, "Kama hutaki kuubeba zaidi, utupe." Akafanya hivyo, na wote wakatimua mbio. Wakakimbia maili kadhaa na wakasimama tu walipofika kwenye mti mkubwa mno, ambao kivulini mwake waliketi kupumzika, wakiwa wameishiwa pumzi kabisa.
Hata hivyo, Quarcoo alikuwa amefika pale kabla yao. Alikuwa ametoka kikapuni kimya, akapita njia ya mkato kukatiza nchi na kufika mtini muda kabla yao. Alikisia kwamba huenda wangepumzika pale kwa hiyo akapanda juu matawini. Akabaki pale, amejificha katikati ya majani, huku wanyama wakiketi ardhini chini.
Pale wakamjadili Quarcoo na taabu yote aliyowaletea. Wakamlaumu Mbuzi kwa kuwa ndiye aliyewashawishi kumchukua mvulana kuwa mtumishi. Mbuzi akiwa mdogo kuliko wote katika kundi alikuwa na kazi za nyumbani za kufanya naye alilikaribisha wazo la kupata msaada. Mbuzi kwa hasira akakana kuwa chanzo cha taabu zao zote, akisema: "Kama kweli mimi ndiye wa kulaumiwa kwa kukubaliwa kwa Quarcoo, na atokee mbele yetu." Quarcoo mara moja akaruka kutoka mtini na kusimama mbele yao. Walitishika mno kwa kutokea kwake hivi kwamba wakatawanyika pande zote. Mbwamwitu akakimbilia vichakani, simbamarara katikati kabisa ya msitu, tembo Nigeria, simba jangwani, na mbuzi makazini mwa binadamu. Hiyo ndiyo sababu sasa wanaishi katika sehemu hizi mbalimbali badala ya kuishi wote pamoja kama walivyoishi zamani.