Simba na Mbwa Mwitu

Bibi mmoja mzee alikuwa na kundi zuri sana la kondoo. Alikuwa amewalisha na kuwatunza vizuri mno hivi kwamba wakawa maarufu kwa unene wao. Baada ya muda mbwa mwitu mwovu akasikia habari zao na akaazimia kuwala.

Usiku baada ya usiku alinyemelea hadi kwenye kibanda cha yule bibi mzee na kumuua kondoo. Mwanamke maskini alijitahidi kadiri alivyoweza kuwaokoa wanyama wake kutokana na madhara lakini akashindwa.

Mwishowe alibaki kondoo mmoja tu katika kundi lote. Mwenyewe alihuzunika sana. Aliogopa kwamba naye pia angechukuliwa, licha ya juhudi zake zote. Alipokuwa akihuzunika kwa wazo hilo simba akafika kijijini kwake.

Alipouona uso wake wenye huzuni, akauliza sababu yake. Bibi akamweleza yote upesi. Hapo simba akajitolea kufanya kila awezalo kumwadhibu mbwa mwitu mwovu. Yeye mwenyewe akaenda mahali ambapo kondoo kwa kawaida alilala wakati kondoo akihamishiwa mahali pengine.

Wakati huo mbwa mwitu alikuwa njiani kuelekea kibandani. Alipokuwa akija alikutana na mbweha. Mbweha alimwogopa kidogo na akajiandaa kukimbia. Hata hivyo, mbwa mwitu akamwambia alikokuwa akienda, na akamkaribisha aende pamoja naye. Mbweha akakubali na wawili hao wakaanza safari pamoja. Wakafika kibandani na wakaenda moja kwa moja mahali ambapo kondoo kwa kawaida alilala. Mara moja mbwa mwitu akamrukia mnyama, huku Mbweha akisubiri nyuma kidogo. Mbweha alipokuwa akiamua kuingia kumsaidia Mbwa Mwitu, ikaja radi ya mwanga mkali. Kwa mwanga wake mbweha aliweza kuona kwamba mbwa mwitu hakuwa akimshambulia kondoo bali simba. Akakimbia kwa haraka, akipiga kelele huku akienda: “Tazama uso wake! Tazama uso wake!”

Wakati wa mwanga ule Mbwa Mwitu kweli alimtazama yule aliyejifanya kondoo. Kwa hofu kubwa akagundua kwamba alikuwa amefanya kosa kubwa. Mara moja akaanza kuomba msamaha kwa unyenyekevu lakini ikawa bure. Simba akakataa kusikiliza maelezo yake yoyote, na upesi akamuua.