Mapambazuko ya Asubuhi

Mtu mmoja katika kijiji kimojawapo alikuwa na binti mrembo sana. Alikuwa mzuri kiasi kwamba watu walimwita “Mapambazuko ya Asubuhi.” Kila kijana aliyemwona alitaka kumwoa. Watatu, hasa, walikuwa na hamu kubwa ya kumwoa. Baba yake aliona vigumu kuchagua kati yao. Akaamua kutumia hila ili kujua ni yupi kati ya hao watatu aliyemstahili zaidi.

Akamwambia alale kitandani mwake kana kwamba amekufa. Kisha akatuma habari za kifo chake kwa kila mmoja wa wachumba wale watatu, akiwaomba waje kumsaidia na mazishi yake.

Mjumbe alifika kwanza kwa “Mwenye Busara.” Aliposikia ujumbe, alisema kwa mshangao, “Mtu huyu anamaanisha nini? Msichana si mke wangu. Hakika sitalipa pesa yoyote kwa mazishi yake.”

Kisha mjumbe akafika kwa mtu wa pili. Jina lake lilikuwa “Mwerevu.” Huyu mara moja akasema, “Ah, hapana kabisa! Sitalipa pesa yoyote kwa gharama za mazishi yake. Baba yake hata hakuniarifu kwamba alikuwa anaumwa.” Kwa hiyo akakataa kwenda.

“Mfikiriaji,” kijana wa tatu, alipopokea ujumbe, mara moja akajiandaa kuondoka. “Hakika lazima niende kumwombolezea Mapambazuko ya Asubuhi,” akasema. “Kama angeishi, hakika angekuwa mke wangu.” Kwa hiyo akachukua pesa na akaanza safari kuelekea nyumbani kwake.

Alipofika, baba yake akaita kwa sauti, “Mapambazuko ya Asubuhi, Mapambazuko ya Asubuhi. Njoo hapa. Huyu ndiye mume wako wa kweli.”

Siku ileile uchumba ukafungwa, na muda mfupi baadaye harusi ikafuata. “Mfikiriaji” na mkewe mrembo waliishi pamoja kwa furaha kubwa