Karibu na kibanda kidogo duni cha Anansi, kulikuwa na ikulu nzuri ambamo aliishi tajiri mkubwa aitwaye Bure. Siku moja Bure na Anansi walipanga kwenda mji wa jirani kutafuta wake. Kwa hiyo, wakaanza safari pamoja.
Bure, akiwa tajiri, alivaa nguo nzuri sana ya mahameli, huku Anansi akiwa na nguo ya pamba iliyochakaa. Walipokuwa njiani, Anansi akamshawishi Bure wabadilishane nguo kwa muda kidogo, akiahidi kumrudishia mahameli nzuri kabla hawajafika mjini. Hata hivyo, alichelewesha kufanya hivyo, kwanza kwa kisingizio kimoja, kisha kingine, hadi wakafika walikokwenda.
Anansi, akiwa amevaa vazi zuri namna hiyo, hakupata shida kupata wake wengi kadiri alivyotaka. Maskini Bure, na nguo yake iliyochakaa na duni, alitendewa kwa dharau kubwa. Mwanzoni, hakuweza kupata hata mke mmoja. Hata hivyo, mwishowe, mwanamke mmoja akamhurumia na kumpa binti yake. Msichana maskini alichekwa sana na wake wa Anansi
kwa kumchagua ombaomba kama Bure alivyoonekana. Kwa busara hakujali dharau yao.
Msafara ukaanza safari ya kurudi nyumbani. Walipofika njia panda zinazoelekea nyumba zao, wanawake walishangaa. Njia ya kuelekea nyumbani kwa Anansi ilikuwa imesafishwa nusu tu. Ile iliyoelekea ikulu ya Bure, bila shaka, ilikuwa pana na imetengenezwa vizuri. Si hivyo tu, bali watumishi wake walikuwa wameitandaza ngozi nzuri na mazulia, kwa maandalizi ya kurudi kwake. Watumishi walikuwa pale, wakimsubiri, na nguo nzuri kwa ajili yake na mkewe. Hakuna aliyekuwa akimsubiri Anansi.
Mke wa Bure akawa malkia juu ya wilaya nzima na akawa na kila kitu ambacho moyo wake ulitamani. Wake wa Anansi hawakuweza hata kupata chakula kinachofaa; walilazimika kuishi kwa ndizi mbichi na pilipili. Mke wa Bure akasikia hali duni ya marafiki zake na akawaalika kwenye karamu kubwa ikuluni mwake. Wakaja, na wakafurahishwa mno na yote waliyoyaona hivi kwamba wakakubali kubaki pale. Kwa hiyo, wakakataa kurudi kwenye kibanda cha Anansi.
Alikasirika sana, na akajaribu kwa njia nyingi kumuua Bure, lakini bila mafanikio. Hata hivyo, mwishowe, akawashawishi baadhi ya marafiki zake panya wachimbe handaki refu
mbele ya mlango wa Bure. Shimo lilipokamilika, Anansi akalitandika visu na chupa zilizovunjika. Kisha akapaka ngazi za ikulu bamia ili ziteleze sana, na akarudi nyuma umbali kidogo.
Alipodhani watu wa nyumbani kwa Bure wamelala salama, akamwita Bure atoke uani aone kitu fulani. Hata hivyo, mke wa Bure akamshawishi asiende. Anansi akajaribu tena na tena, na kila mara mkewe alimwambia mumewe asisikilize. Mwishowe, Bure akaazimia kwenda kukiona kitu hicho. Alipoweka mguu wake kwenye ngazi ya kwanza, bila shaka, akateleza, na akaanguka ndani ya shimo. Kelele zikawashtua watu wa nyumbani. Taa zikaletwa, na Bure akakutwa ndani ya mtaro, amejeruhiwa vibaya mno na visu hivi kwamba alikufa muda mfupi baadaye. Mkewe alihuzunika mno kwa kifo chake cha ghafla. Akachemsha viazi vikuu vingi, akaviponda, na akapeleka sahani kubwa kote wilayani. Kila mtoto aliyekutana naye, alimpa kidogo, ili mtoto amsaidie kumlilia mumewe. Hii ndiyo sababu, ukimkuta mtoto analia na kuuliza sababu, mara nyingi utaambiwa kwamba “analia bure.”