Hapo zamani mtu mmoja na mwanawe walikuwa wakienda sokoni pamoja na punda wao.
Walipokuwa wakitembea kando yake, mwanakijiji mmoja akawapita na kusema,
"Enyi wapumbavu, punda ni wa nini kama si wa kupanda?" Basi yule mtu akampandisha mvulana juu ya punda, na wakaendelea na safari yao.
Lakini punde wakapita kundi la wanaume, na mmoja wao akasema, "Mtazame kijana yule mvivu, anamwacha baba yake atembee huku yeye akipanda."
Basi yule mtu akamwamuru mwanawe ashuke, na akapanda yeye mwenyewe. Lakini hawakwenda mbali kabla ya kuwapita wanawake wawili, na mmoja wao akamwambia mwenzake, "Aibu kwa mzembe yule kumwacha mwanawe mdogo maskini atembee kwa taabu."
Basi, yule mtu hakujua la kufanya, lakini mwishowe akampandisha mvulana mbele yake juu ya punda. Kufikia wakati huo walikuwa wamefika mjini, na wapita njia wakaanza kuwadhihaki na kuwanyooshea vidole. Yule mtu akasimama na kuuliza walikuwa wakidhihaki nini.
Wanaume wakasema, "Huoni aibu kumtwika mzigo mzito punda wako maskini, wewe na mwanao bonge?"
Yule mtu na mvulana wakashuka na kujaribu kufikiri la kufanya. W
akafikiri na kufikiri, hadi mwishowe wakakata mti, wakafunga miguu ya punda juu yake, na wakainua mti pamoja na punda mabegani mwao. Wakaendelea huku kila aliyekutana nao akicheka hadi wakafika kwenye daraja,
ndipo punda, akiwa amejinasua mguu mmoja, akapiga teke na kumfanya mvulana aangushe upande wake wa mti. Katika purukushani hiyo punda akaanguka kutoka darajani, na kwa kuwa miguu yake ya mbele ilikuwa imefungwa pamoja, akazama.
Ukijaribu kumridhisha kila mtu, hutamridhisha yeyote.