Palikuwa na furaha hewani wanakijiji wa kabila la Asante nchini Ghana walipokusanyika kwa sherehe ya siku tatu ya harusi ya Binti Mfalme mrithi.
Binti Mfalme Yaa alitarajiwa kuolewa na Mwana wa Mfalme kutoka kijiji jirani naye alikuwa na hamu kubwa sana.
Mwana wa Mfalme na Binti Mfalme walikua pamoja na walikuwa wamefahamiana katika sherehe nyingi za kijiji na za kitaifa. Hata walikuwa wameiba muda wa thamani wakiwa peke yao katika miezi yao mingi ya uchumba. Maisha yake yote Binti Mfalme alikuwa akisubiri siku kama hiyo ifike: harusi kubwa ambayo yeye angekuwa kitovu kamili cha macho ya wote.
Kujiandaa kwa sherehe za usiku wa kwanza, vijakazi wakampamba Binti Mfalme wao kwa vito vizuri vya dhahabu, shanga, na michoro maridadi ya wino kwenye ngozi yake.
'Binti Mfalme, akasihi mmoja wa vijakazi, 'tafadhali tuambie unajisikiaje kuhusu mume wako mtarajiwa?
Binti Mfalme akajibu kwa sauti ya kawaida kabisa. 'Ni mtu mzuri, wa kutabirika lakini mwaminifu. Atakuwa mume mwema. Kama ingekuwa chaguo langu ningeolewa na mtu mwenye ujasiri zaidi wa vituko, wa hatari zaidi; mtu mwenye mali zaidi na sura nzuri zaidi. Lakini nani ajuaye, akasema Binti Mfalme kwa tabasamu ovu, 'huenda nikaishia kumpenda mume wangu maskini siku moja. Kwa sasa nimeridhika kumkubali kwa sababu atanitunza. Ni huruma tu kwamba hataweza kutimiza tamaa zangu zote za kidunia kwa sababu familia yake si tajiri hata kidogo kama yangu?
Kijakazi mdogo kuliko wote akauliza, 'Binti Mfalme, utafanya nini bila dhahabu yako, shanga zako na mawe yako ya thamani?'
Binti Mfalme akacheka kwa kikwekwe na kujibu, 'Nitampata mpenzi tajiri kutoka mjini.
Hata hivyo, kuna kikomo cha maisha ya kuchosha ambayo msichana mrembo kama mimi anaweza kuvumilia.
Vijakazi wote wakaanza kucheka kwa sababu walijua kwamba Binti Mfalme wao kweli alikuwa mtukutu sana na hakika angefanya kama alivyosema nyuma ya mgongo wa mume wake maskini.
Na hivyo asubuhi ya harusi mwishowe ikafika. Binti Mfalme alikuwa bado amekasirika kidogo kwa mazungumzo aliyokuwa nayo na wazazi wake usiku uliotangulia. Binti Mfalme alikuwa ameomba baba yake amsaidie mume wake mpya kifedha ili kijana yule aweze kumnunulia Binti Mfalme vito zaidi na vitu vya kidunia. Baba yake alikataa, akimhakikishia binti yake wa pekee kwamba utajiri si kitu muhimu kuliko vyote duniani.
Binti mfalme alidhani kwamba baba yake alikuwa mjinga sana na mchoyo.
'Hata hivyo, akajiambia, 'kwake ni sawa tu, yeye tayari ni tajiri. Na mimi je?'
Binti Mfalme akajitazama kiooni, mwili wake mzuri ukiwa umepambwa kwa vito bora kabisa. Kisha akatazama chumba chake cha anasa chenye hariri nzuri na samani za bei ghali. Mwishowe akatambua kwamba ingemlazimu aache anasa hii yote nyuma. Mume wake mtarajiwa hakuwa maskini, lakini hakuwa tajiri kupita kiasi na hangeweza kumudu kumweka katika anasa aliyokuwa ameizoea. 'Laiti tajiri fulani angekuja kuniokoa kutoka kwa maisha ya kuchosha yanayonisubiri, akafikiri binti mfalme mwenye tamaa.
Wanakijiji wakaanza kukusanyika ili kumwona Binti Mfalme wao mpendwa akiolewa.
Baadhi ya wanakijiji walifurahi kwa sababu walijua kwamba Mfalme na Malkia walikuwa wakihakikisha Binti Mfalme anaolewa kwa sababu njema na si kwa ajili ya utajiri tu. Wengine hawakufurahi sana kwa sababu walidhani Binti Mfalme anapaswa kuolewa na mtu muhimu na tajiri ambaye angesaidia kukifanya kijiji chao kijulikane na kutambuliwa kimataifa.
Palikuwa na ukimya na matarajio katikati ya umati Binti Mfalme mrembo alipoanza kutembea kwenye njia ya katikati kuelekea mume wake mtarajiwa. Kisha ukimya ukavunjwa na sauti ya farasi waliokuwa wakikaribia. Kijiji kizima kikatazama farasi walipokuwa wakisimama mbele ya sherehe ya harusi. Juu ya farasi wa kwanza aliketi kijana mzuri wa sura. Alivaa vito vinavyong'aa na alikuwa amepambwa kwa vitambaa bora kabisa. Viatu vyake vilitengenezwa kwa hariri tupu, na koti lake lilitengenezwa kwa mahameli tajiri iliyonakshiwa kwa almasi na yakuti za thamani.
Mgeni yule mzuri wa sura akauendea umati na kujitambulisha kuwa Mwana wa Mfalme wa kijiji cha mbali. 'Nimekuja kumwomba Binti Mfalme mkono wake tuoane, akatangaza mgeni yule mzuri wa sura. 'Nimesafiri siku mbili mchana na usiku ili tu nifike hapa kabla hajapewa mwingine.'
Mfalme akasogea mbele na kumchunguza mgeni kwa makini. 'Nina hakika wewe ndiye unavyosema ulivyo, kijana, lakini siwezi kumpa binti yangu mgeni kabisa. Ameposwa na mwingine na anapaswa kuolewa siku hii ya leo’.
Alipomwona mgeni yule mzuri wa sura amevaa mapambo yake yote, Binti Mfalme mara moja akaomba azungumze na wazazi wake faraghani. Wanakijiji wakaachwa wakitafakari kingeweza kutokea nini.
Hakuna aliyejua jambo hili lingeishaje. Mwishowe Binti Mfalme na Mfalme na Malkia wakarudi. Mfalme kwa kusita akatangaza kwamba Binti Mfalme alikusudia kuolewa na mgeni yule mzuri wa sura badala ya mume aliyechaguliwa kwa ajili yake. Wazee wa kijiji mara moja wakapinga kitendo kama hicho. Mfalme naye akaeleza wasiwasi wake mwenyewe na akasisitiza kwamba chaguo la binti yake lingekuwa na matokeo. 'Kama binti yangu atabadili nia na kukubali kuolewa na mtu tuliyemchagulia, akatangaza Mfalme, 'basi atafanya hivyo kwa baraka zangu na za kijiji kizima. Lakini kama atakuwa mkaidi, na kuchagua kuolewa na mgeni huyu ambaye hatujui chochote kumhusu, basi atafukuzwa kutoka ufalme wetu na kulazimika kujitafutia bahati yake mwenyewe.
Malkia alihuzunika sana na akamsihi binti yake aolewe na mtu waliyemchagulia. Lakini Binti Mfalme alikuwa ameamua na alikuwa ameazimia kuolewa na mgeni yule mzuri wa sura, akiamini kwamba kweli alikuwa Mwana wa Mfalme tajiri kutoka nchi ya mbali.
Na hivyo ndivyo kasisi alivyowafungisha ndoa Binti Mfalme na mgeni yule mzuri wa sura. Lakini ilikuwa sherehe ya huzuni bila baraka za Mfalme na wazee wa kijiji.
Sherehe ilipokwisha, Mfalme akaamuru binti yake aliyetengwa na mume wake mpya wasindikizwe hadi ukingo wa ufalme wakiandamana na vijakazi wake waaminifu tu. Ilikuwa katika safari hii ya huzuni kutoka kijijini ndipo vijakazi wa Binti Mfalme walipoanza kuimba kwa pamoja kwa sauti laini...
Mbali kwa ajili ya ndoa sitakwenda
Mbali kwa ajili ya ndoa sitakwenda
Lakini tunakutakia kila la heri,
ukiacha nyumba yako na familia kwa maisha ya mbali na mgeni asiyejulikana na yeyote
Mbali kwa ajili ya ndoa sitakwenda
Mbali kwa ajili ya ndoa sitakwenda
Msafara ulipokaribia ukingo wa ufalme, Binti Mfalme akawapungia vijakazi wake mkono wa kwaheri. Kisha yeye na mume wake mpya, wakiandamana na watumishi wake wengi, wakavuka mto wakiwa juu ya farasi na kuanza safari yao kwa dhati.
Baada ya kusafiri kwa saa nyingi, Binti Mfalme akachoka na kuona njaa. 'Mpenzi wangu, tafadhali tunaweza kupumzika ili watumishi wako waniletee maji kidogo?'
'Watumishi gani?' akajibu Mwana wa Mfalme kwa sauti kali.
Binti Mfalme akatazama pande zote na kutambua kwamba watumishi walikuwa wametoweka. Sasa walikuwa wao wawili tu, wakipanda farasi peke yao.
'Usijali, akasema Mwana wa Mfalme, 'tumekaribia kufika nyumbani?
Binti Mfalme alikuwa amechoka na mwenye njaa na hakuzoea kusafiri bila watumishi, lakini aliendelea na safari pamoja na mume wake mpya na punde akajikuta akipanda farasi kuingia katika msitu wa miti mirefu. Msitu ulikuwa baridi, wenye giza na wa kutisha, na uliruhusu mwanga mdogo wa jua kupita kupitia dari nene ya matawi juu.
'Tazama pale!' akasema Mwana wa Mfalme kwa mshangao. 'Tumefika nyumbani hatimaye.'
Lakini hapakuwa na kitu ila miti pande zote na Binti Mfalme alichanganyikiwa sana. 'Sioni chochote, mpenzi wangu?'
Mume wake mpya aliposhuka kutoka farasi wake, akatabasamu tabasamu ovu. 'Inachekesha jinsi ambavyo hukuwahi hata kuniuliza jina langu, lakini ulikubali kuolewa nami. Nani huolewa na mtu ambaye hajui chochote kumhusu?'
Binti Mfalme akajaribu kutulia ingawa alikuwa akizidi kuingiwa na wasiwasi kila dakika. 'Mpenzi wangu, nilijua kwamba wewe ndiye mtu wangu tangu wakati ule nilipokuona?'
'Nadhani ulitaka tu kuolewa nami kwa sababu ya sura yangu ya nje, uzuri wangu na utajiri wangu. Uliolewa kwa sababu za juujuu, si kwa upendo!'
Binti Mfalme alikosa la kusema mume wake mpya alipoendelea kumdharau na kumhubiria. 'Mimi si mtu unayedhani nilivyo, Binti Mfalme. Kwa kweli, mimi si mtu hata kidogo. Jina langu ni Mbwamwitu, na mwezi mpevu utakapochomoza nitageuka tena kuwa mbwamwitu nawe utageuka pamoja nami. Pamoja tutaishi katika msitu huu, wote wawili tukiwa waokotaji maskini wa mizoga. Unaona, Binti Mfalme mpendwa, kila kinachong'aa si dhahabu. Ungekuwa na busara zaidi kama ungewasikiliza wazazi wako, na wazee wa kijiji walio na uzoefu zaidi kuliko wewe. Macho yako daima yanatafuta kitu bora zaidi, bila kuridhika kamwe na unachokijua au ulicho nacho. Hilo ndilo lililokuleta hapa kwangu. Hii ndiyo hatima yako.
Binti Mfalme alilia usiku kucha. Alikuwa amelaaniwa kuishi kama mwokotaji maskini wa mizoga katika msitu huu, amelaaniwa kugeuka mbwamwitu kila mwezi mpevu unapochomoza, asione tena kamwe ufalme wake wala familia yake; na yote haya alijiletea mwenyewe kwa sababu ya kutotii kwake na tabia yake ya tamaa.