Hapo zamani za kale, katika siku za mbali zilizopita, kulikuwa na vita vikubwa kati ya wanyama wanaoishi angani na wale wanaoishi ardhini. Hakuna anayekumbuka sasa vita hivyo vilianzaje wala vilihusu nini, lakini ulikuwa wakati wa kutisha. Wanyama wengi wa pande zote mbili walijeruhiwa au kuuawa, na hatimaye mtu fulani akasema kwamba wakiendelea hivi, hakutabaki mnyama yeyote duniani. Kwa hiyo baadhi ya wanyama wa angani na baadhi ya wanyama wa ardhini wakafanya mkutano, na kwa kuwa hakuna aliyeweza kukumbuka walikuwa wakipigania nini, wakakubaliana kwamba mapigano yasitishwe, na amani itangazwe.
Kwa upande wa wakazi wa angani, korongo aliteuliwa kutoa matangazo, na kwa upande wa wanyama wa ardhini, sungura angefanya kazi hii, kwa kuwa aliweza kuzunguka eneo lote kwa haraka sana. Hilo likafanyika asubuhi iliyofuata, lakini wanyama wote walipokuwa wakitulia, wakitambua kwamba sasa wangeweza kuishi kwa amani na kujenga upya maisha yao, mtu fulani akaukuta mwili wa Bwana Popo. Yeye alikuwa mhanga wa mwisho wa vita, na lazima aliuawa jioni ya siku iliyotangulia. Wanyama wote wanaoruka walihuzunika sana, na wakaamua kumwandalia rafiki yao mazishi makubwa. Lakini walipokuwa wakiuandaa mwili wake kwa mazishi, mmoja wa ndege akagundua kwamba Bwana Popo alikuwa na meno kinywani mwake.
Hilo liliwezekanaje? Wanyama wanaoruka hawana meno. Wakaitisha mkutano, na wakakubaliana kwamba Popo hawezi kuwa mmoja wao, kwa kuwa hakuna ndege mwingine mwenye meno kinywani. Kwa hiyo wakaupeleka mwili wa popo kwa wanyama wa ardhini,
na wakawaambia kwamba kwa kuwa Bwana Popo hakuwa ndege, lilikuwa jukumu lao kumzika kwa heshima.
Wanyama wa ardhini wakakubali kuupokea mwili, lakini kisha, walipokuwa wakijiandaa kwa mazishi, mmoja wao akapiga kelele: "Subirini kidogo, popo huyu anaweza kuwa na meno, lakini bila shaka pia ana mabawa! Atawezaje kuwa mmoja wetu kama ana mabawa?"
Kwa hiyo sasa wanyama wa ardhini wakafanya mkutano kulitafakari tatizo hilo, na wakaamua kwamba hakuna mnyama wa ardhini anayeweza kuwa na mabawa, kwa hiyo, Bwana Popo hawezi kuhesabiwa kuwa mmoja wao. Kwa hiyo nao pia wakakataa kumzika Bwana
Popo.
Maskini Bwana Popo, wanyama wanaoruka walikataa kumpokea kwa sababu ana meno, na wanyama wa ardhini walikataa kumpokea kwa sababu ana mabawa. Na ndiyo sababu popo bado anaruka huku na huko kila usiku.