Zamani sana, mwindaji mmoja mwovu na mvivu alikuwa ameketi chini ya mti. Alikuwa akiwaza kwamba kulikuwa na joto mno kujisumbua na kazi ngumu ya kunyemelea mawindo vichakani. Chini yake katika uwazi kwenye mbuga yenye nyasi kulikuwa na swala wanono wakichunga. Lakini mwindaji huyu hakutaka kujisumbua, alikuwa mvivu kiasi hicho! Akalitazama kundi, akitamani apate nyama bila kazi, ghafla akaona kitu kikisogea upande wa kushoto wa swala.
Alikuwa duma jike akitafuta chakula. Akijiweka upande ambao upepo usingebeba harufu yake kwa kundi, akasogea karibu na karibu zaidi kwao. Akamchagua swala mmoja aliyekuwa amejitenga kwa upumbavu na wenzake. Ghafla akakunja miguu yake mirefu chini yake na kuruka mbele. Kwa kasi kubwa akamfikia swala na kumwangusha. Kwa mshtuko, kundi lililobaki likatimka mbio huku duma akimuua windo lake upesi.
Mwindaji akatazama duma akimburuta zawadi yake hadi kivulini pembezoni mwa uwazi. Pale watoto watatu warembo wa duma walikuwa wakimsubiri. Mwindaji mvivu akajaa wivu kwa watoto hao na akatamani naye awe na mwindaji hodari kama huyo wa kumhudumia.
Fikiria kula nyama tamu kila siku bila kulazimika kuwinda mwenyewe! Kisha akapata wazo ovu. Akaamua kwamba angeiba mmoja wa watoto wa duma na kumfundisha amwindie. Akaamua kusubiri hadi duma mama aende kisimani jioni ili
atekeleze mpango wake. Akatabasamu moyoni.
Jua lilipoanza kuzama, duma aliwaficha watoto wake kichakani na akaenda kisimani. Haraka mwindaji akachukua mkuki wake na akaenda kwa hatua za haraka hadi vichakani walikofichwa watoto. Pale akawakuta watoto watatu, bado wadogo mno kumwogopa au kukimbia. Kwanza akamchagua mmoja, kisha akaamua mwingine, kisha akabadili nia tena. Mwishowe akawaiba wote, akijiambia kwamba duma watatu bila shaka wangekuwa bora kuliko mmoja.
Mama yao aliporudi nusu saa baadaye na kukuta watoto wake wametoweka, moyo wake ukavunjika. Duma mama maskini akalia na kulia hadi machozi yake yakaacha madoa meusi chini kwenye mashavu yake. Akalia usiku kucha na hadi siku iliyofuata. Alilia kwa sauti kubwa mno kiasi kwamba mzee mmoja akamsikia na kuja kuona kelele zile zilikuwa za nini.
Basi mzee huyu alikuwa na hekima na alijua desturi za wanyama. Alipogundua kile mwindaji mwovu alichokifanya, alikasirika sana.
Mwindaji mvivu hakuwa mwizi tu, alikuwa amevunja mila za kabila. Kila mtu alijua kwamba mwindaji lazima atumie nguvu na ustadi wake mwenyewe tu. Njia nyingine yoyote ya kuwinda hakika ilikuwa aibu.
Mzee akarudi kijijini na kuwaeleza wazee kilichotokea. Wanakijiji wakakasirika. Wakamtafuta mwindaji mvivu na kumfukuza kijijini. Mzee akawarudisha watoto watatu wa duma kwa mama yao mwenye shukrani. Lakini kilio kirefu cha duma mama kiliacha madoa usoni mwake milele. Leo duma huvaa madoa ya machozi usoni mwake kama ukumbusho kwa wawindaji kwamba si heshima kuwinda kwa njia nyingine yoyote isipokuwa ile ya jadi.