Zamani sana, Kaa alikuwa mtu mzuri sana wa sura. Alikuwa mrefu na alikuwa na nywele nzuri. Pia alikuwa mwema sana. Alikuwa na marafiki wengi. Marafiki wa Kaa walijua kwamba alikuwa mtu mwema, kwa hiyo mara nyingi walimwomba awafanyie mambo mengi.
Siku moja, Nge akasema, “Nataka kuhamishia nyumba yangu mahali papya. Unaweza kunibebea?” Kaa aliweza kumbebea Nge nyumba.
Siku nyingine, Konokono akasema, “Ninakwenda shambani kwangu. Mto umejaa maji mengi sana, na siwezi kuuvuka. Unaweza kuninywea maji?” Kaa aliweza kunywa maji yote, na Konokono akavuka mto kwenda shambani kwake.
Siku chache baadaye, Kamba-Mti akaja kwa Kaa. Akasema, “Rafiki yangu, ninakaribia kuoa. Tafadhali nipe kitambaa cha kente nivae.” Hili ndilo lililokuwa jambo jepesi zaidi kwa Kaa kufanya. Akampa Kamba-Mti kitambaa cha kente na pia akampa jozi ya viatu.
Siku moja, Buibui akaja na kusema, “Kaa, nimo matatani. Lazima niende nyumbani kwa Chifu sasa. Lazima nifikiri na kuzungumza vizuri na chifu. Nipe kichwa chako ili niweze kufikiri na kuzungumza vizuri.”
Kaa akajibu, “Rafiki yangu mwema, nasikitika kwamba umo matatani. Unaweza kuchukua kichwa changu ili ufikiri na kuzungumza vizuri na chifu.” Kaa akampa Buibui kichwa chake. Buibui akaweka kichwa cha Kaa juu ya kichwa chake mwenyewe na akaenda nyumbani kwa Chifu. Chifu alikasirika sana kumwona.
Chifu akasema, “Buibui, wewe ni mtu mbaya. Uliiba dhahabu yangu. Kwa sababu ya hilo, tutakata kichwa chako! Sasa, askari, kateni kichwa chake!” Askari wakakata kichwa cha Buibui mara moja, lakini kwa kweli kilikuwa kichwa cha Kaa. Buibui akaondoka, na hakuna aliyemwona tena.
Kaa akasubiri na kusubiri, lakini Buibui hakurudi. Kaa akabaki ndani ya shimo lake. Hakuweza kutoka nje. Hakuweza kuona kwa sababu hakuwa na kichwa. Hakuweza kusikia, na hakuweza kula.
Mwishowe, Mungu akamhurumia Kaa. Akamwambia, “Nitakusaidia kuona, kusikia na kula.” Mungu akampa Kaa gamba gumu kufunika mwili wake. Akaweka vijiti viwili vifupi juu ya gamba viwe macho yake. Akampa mdomo na meno. Mungu pia akampa Kaa miguu, miwili mikubwa ikawa magando yake. Angeweza kutumia magando kuwabana watu waliojaribu kumsumbua. Mungu akamwambia atumie miguu mingine kama mikono na miguu yake.
Marafiki wa Kaa wakaanza kumwogopa na hawakuja tena kwake. Tangu wakati huo, Kaa ameishi kimya na peke yake ndani ya shimo lake.
Sasa tunajua kwa nini Kaa hana kichwa na kwa nini anapenda kuwabana watu.
Funzo la hadithi hii ni kwamba kujitolea na wema vinaweza kuleta matokeo yasiyotarajiwa. Ingawa utayari wa Kaa kuwasaidia marafiki zake hatimaye ulimletea msiba wake mwenyewe, pia unatufundisha umuhimu wa kuwa waangalifu tunapowaamini wengine. Zaidi ya hayo, unaonyesha jinsi ukarimu wa mtu unavyoweza kuchukuliwa kirahisi, na kusababisha upweke na haja ya kubadilisha tabia ili kujilinda.