Alidu alikuwa na mbuzi kama mia moja kijijini kwake. Siku moja, alikwenda nyumbani kwa chifu na kumwambia, “Nina mbuzi mzee. Anaweza kucheza ngoma, kuimba na kuongea.”
Chifu akajibu, “Najua mbuzi anaweza kucheza na farasi anaweza kucheza. Mbuzi anaweza kupiga kelele, lakini hawezi kuimba wala kuongea. Kama mbuzi wako anaweza kuongea, nitakupa ng'ombe mmoja mnono. Wanaume wote wa kijiji watakutana sokoni Ijumaa asubuhi. Mlete mbuzi wako. Akiongea, utapata pesa nyingi. Asipoongea, watu wangu watakuua.”
Ijumaa asubuhi, watu wote wa kijiji wakakusanyika sokoni. Alidu na mbuzi wakasimama mbele ya umati. Kila mtu alikuwa akisubiri mbuzi aongee. Walisimama pale kwa muda mrefu, lakini mbuzi hakusema neno. Alidu akampa muhogo ale, lakini mbuzi akabaki kimya. Kisha akampa viazi vikuu, lakini bado hakuongea. Chifu akamwambia Alidu, “Ulichoniambia si kweli. Mbuzi wako hawezi kuongea. Watu wangu watakupiga hadi ufe.” Wanaume wawili wenye nguvu wakasonga mbele na kuanza kumchapa Alidu kwa fimbo.
Ghafla, mbuzi akaruka mara tatu na kusema kwa sauti,
“Msimpige bwana wangu!
Msimpige bwana wangu!
Msimpige bwana wangu!”
Kila mtu akanyamaza kimya. Wale wanaume wawili wakaacha kumpiga Alidu, na watu wote wakampigia makofi. Kisha chifu akampa ng'ombe mnono sana. Wakiwa njiani kurudi nyumbani, Alidu akamuuliza mbuzi, “Kwa nini uliwaacha wanipige?” Mbuzi akajibu, “Hivyo ndivyo unavyompata ng'ombe mkubwa.” Alidu akasema, “Wewe kweli ni MBUZI!”
Funzo la hadithi hii ni kwamba ubunifu na ujasiri vinaweza kugeuza hali ngumu kuwa matokeo ya bahati. Alidu alikabiliwa na madhara makubwa kwa madai yake ya kutia chumvi kuhusu mbuzi, lakini kwa kufikiri haraka na uaminifu wa mbuzi, walifanikiwa kushinda mwishowe. Hadithi inatukumbusha kwamba ingawa kupotosha ukweli kunaweza kuleta matatizo, werevu na msaada wa marafiki vinaweza kutusaidia kupita katika changamoto kwa mafanikio.