Ndege walitaka mfalme. Binadamu wana mfalme, wanyama wana mfalme, kwa nini wao wasiwe naye? Ndege wote wakakusanyika kuamua.
“Mbuni, kwa sababu ndiye mkubwa kuliko wote,” mmoja akapaza sauti.
“Hapana, hawezi kuruka.”
“Tai, kwa sababu ya nguvu zake.”
“Si yeye, ni mbaya mno sura.”
“Tumbusi, kwa sababu anaweza kuruka juu kuliko wote.”
“Hapana, Tumbusi ni mchafu mno, na harufu yake ni mbaya kupindukia.”
“Tausi, ni mzuri mno.”
“Miguu yake ni mibaya mno, na sauti yake ni ya kutisha.”
“Bundi, kwa sababu anaona vizuri.”
“Hapana, Bundi huona aibu na mwanga.”
Na hivyo hawakupiga hatua yoyote. Kisha ndege mmoja akapiga kelele kwa sauti, “Anayeweza kuruka juu kuliko wote atakuwa mfalme!”
“Ndiyo, ndiyo!” wote wakapiga makelele, na ishara ilipotolewa, wakapaa moja kwa moja juu angani.
Tumbusi akaruka kwa siku tatu nzima bila kusimama, moja kwa moja kuelekea jua. Kisha akapaza sauti, “Mimi ndiye niliye juu kuliko wote! Mimi ni mfalme!”
“Ti-si, ti-si, ti-si,” ghafla akasikia juu yake. Pale alikuwa Tink-Tinkje, ndege mdogo kabisa, akiruka juu zaidi. Alikuwa amejishikiza kwa siri kwenye mojawapo ya manyoya makubwa ya bawa la Tumbusi, bila kuonekana kwa sababu alikuwa mwepesi mno.
“Mimi ndiye niliye juu kuliko wote! Mimi ni mfalme!” akalia Tink-Tinkje kwa sauti nyembamba.
Tumbusi akaendelea kuruka siku nyingine, akipanda juu zaidi. “Mimi ndiye niliye juu kuliko wote! Mimi ni mfalme!” akaita.
“Ti-si, ti-si, ti-si,” yule mdogo akadhihaki tena kutoka juu.
Siku ya tano, Tumbusi akajikaza, akipanda juu kuliko wakati wowote. “Mimi ndiye niliye juu kuliko wote! Mimi ni mfalme!” akapiga kelele kwa kukata tamaa.
Lakini tena, sauti ya Tink-Tinkje ikasikika wazi: “Mimi ndiye niliye juu kuliko wote! Mimi ni mfalme!”
Akiwa amechoka kabisa, hatimaye Tumbusi akakata tamaa na kushuka ardhini. Ndege wengine walipojua hila ya Tink-Tinkje, walikasirika mno. “Lazima afe kwa kudanganya!” wakalia. Wote wakamfukuza, na Tink-Tinkje akanusurika tu kwa kujitumbukiza ndani ya shimo la panya.
“Tutamkamataje?” ndege wakauliza. “Lazima mtu asimame kulinda na kumkamata mara tu atakapotoka.”
“Bundi lazima alinde,” wakaamua. “Ana macho makubwa kuliko wote; anaweza kuona vizuri kuliko wote.”
Bundi akachukua nafasi yake mbele ya shimo. Lakini jua la joto likamletea usingizi upesi, na muda si mrefu, akalala fofofo.
Tink-Tinkje akachungulia nje, akaona kwamba Bundi anakoroma, na fyuu, akatoweka! Ndege wengine waliporudi, wakakuta shimo tupu. Ghafla, wakasikia kilio chake cha kejeli kutoka kwenye mti wa karibu: “Ti-si, ti-si, ti-si!”
Kunguru Mweupe, akiwa amechukizwa kupita maelezo, akafoka, “Sitasema neno lingine kamwe!” Na tangu siku hiyo hadi leo, Kunguru Mweupe hajawahi kuongea. Hata akipigwa, hatoi sauti, wala kilio.