Mepoho alikuwa mpiga ramli mashuhuri wa Wamijikenda.
Machache yanajulikana kuhusu kuzaliwa kwake lakini inadaiwa kwamba alilelewa na wasio wazazi wake. Inasemekana kwamba aliokotwa kando ya kidimbwi asubuhi moja ya baridi karibu na Kaloleni wakati kundi la wanawake lilipokwenda kuteka maji. Wanawake hao walishtuka zaidi walipoona kwamba mtoto huyo wa kike alikuwa amefungwa kwa nguo ya buluu (Musimbiji) ambayo kwa mujibu wa mila ilitumiwa na wapiga ramli miongoni mwa Wamijikenda. Wapiga ramli ni kama manabii, na wapiga ramli wanawake wa kabila hilo walivaa nguo ya buluu iitwayo Hando ra Musimbiji.
Ukweli kwamba usiku uliotangulia mvua kubwa ilikuwa imenyesha, ikiambatana na upepo mkali, uliufanya ugunduzi wake kuwa wa kimafumbo zaidi kwa sababu isingewezekana mtu yeyote kutembea katika hali ile ya hewa kwenda kumwacha mtoto karibu na kidimbwi. Hata wakazi wa eneo la karibu na kidimbwi walipojaribu kuchunguza kama kulikuwa na mwanamke aliyejifungua hivi karibuni hawakumpata yeyote. Wala mwanamke aliyemwokota mtoto hakueleza sababu zake za kumwokoa.
Mtoto huyo wa kike, Mepoho, akakua, akawa mpiga ramli. Aliweza kutabiri mambo ambayo yangetokea katika miaka ijayo. Kwa kawaida, mpiga ramli angeshiriki ngoma ya kiroho ambapo, baada ya kupagawa na pepo, angeweza kutabiri. Aliweza kutabiri maafa yoyote kama ukame, njaa au mafuriko.
Kuna mahali patakatifu Kaloleni panapoaminiwa kuwa palikuwa mahali pa ibada pa Mepoho. Haijulikani wazi kama aliishi hadi uzeeni lakini inaaminika kwamba siku moja, aliagiza ngoma ya kiroho (ngoma za pepo) ichezwe Kaloleni kwa kuwa alikuwa na utabiri muhimu sana wa kulipa kabila. Ngoma ilipokuwa ikichezwa, akiwa ameketi juu ya kigoda chake cha jadi cha Kigiriama chenye miguu mitatu, Mepoho akapagawa na akaanza kusimulia utabiri wake. Alisema kwamba wangekuja watu wenye nywele nyeupe kama nyuzi za mkonge na watakapokuja, kabila lingeshuhudia vyombo angani, majini na nchi kavu. Wangewaona wasichana wadogo wakizaa watoto na wao (watu wenye nywele nyeupe) pia wangevuta ugoro (tumbaku). Kisha akalionya kabila kwamba mambo haya yatakapotimia, utamaduni wao ungeharibiwa na ardhi yao ingechukuliwa.
Alipomaliza utabiri wake, aliwaambia watu kwamba amechoka na asingependa kuwepo wakati utabiri wake ukitimia na kwa hiyo, alikuwa akiondoka. Chini ya kigoda chake, ardhi ikafunguka na akamezwa akiwa hai. Hili lilitokea mahali palipo sasa kituo cha biashara cha Kaloleni, mita chache kutoka kituo cha mabasi na matatu cha Mombasa.