Siku moja Bi Kobe alisikia habari za ngoma iliyopangwa kufanyika katika mji wa jirani. Alitamani sana kwenda, lakini hakuwa na mkufu wa kuvaa.
Baada ya kulitafakari jambo hilo, akaenda kwa rafiki yake, Bi Nguruwe, aliyeishi upande wa pili wa mji, kumwazima mkufu wake. Rafiki yake alifurahi sana kumsaidia, na kwa matarajio makubwa ya kufurahia mno, Bi Kobe akaondoka haraka.
Wakati wa ngoma, katikati ya msisimko wote, mkufu ukaibiwa kutoka kwa Bi Kobe. Jambo hili lilimhuzunisha sana na likamfanya aondoke ngomani mapema.
Akiwa njiani kurudi nyumbani, akasimama kwa Bi Nguruwe.
"Umerudi na mkufu wangu?" Bi Nguruwe akauliza.
"Umeibiwa," akajibu Bi Kobe kwa sauti ya huzuni.
"Basi utaulipia," Bi Nguruwe akajibu kwa hasira.
Miezi kadhaa ikapita. Muda wote huo, Bi Kobe hakuonekana kabisa. Kwa hiyo siku moja Bi Nguruwe akamwambia mumewe, "Mguno, afadhali uende kibandani kwa Kobe ukafuatilie malipo ya mkufu wangu. Lazima nipate mwingine kabla ya ngoma kubwa ya mwezi mpevu ujao. Afadhali uanze kwenda. Hakuna muda wa kupoteza!"
Basi Mguno akaenda kibandani kwa Kobe. Kobe alipomwona Mguno Nguruwe akikaribia kibanda chake, akamwambia mkewe, "Nguruwe akiingia humu, mwambie sipo nyumbani!"
Kisha akajitupa chini, gamba likiwa juu, na akaingiza kichwa na miguu yake ndani. Katika hali hii, alifanana sana na kinoo.
Nguruwe alipoingia, akauliza, "Kobe yuko wapi?"
"Hayupo," mke wa Kobe akadanganya.
Aliposikia hivyo, Nguruwe akakasirika sana na, alipoona kile alichodhani ni kinoo kimelala sakafuni, akasema, "Nitachukua kinoo chake." Akakiokota kile alichodhani ni kinoo, bila kujua kwamba kwa kweli alikuwa Kobe aliyejigeuza gamba juu, na akatoka kibandani nacho.
Akaficha kile kinoo cha kudhaniwa nyasini kando ya njia na akaweka alama mahali pale kwa kijiti. Kisha akarudi kibandani kwa Kobe kumsubiri arudi.
Mara tu Mguno Nguruwe alipomwacha, Kobe akajigeuza na kuondoka.
Wakati huo, Nguruwe alikuwa akisubiri kwa hamu kurudi kwa Kobe. Baada ya muda, Kobe akarudi kibandani kwake na pale akakutana na Mguno Nguruwe. Nguruwe, alipomwona Kobe, mara moja akabwata, "Nilipe mkufu ambao mkeo aliuazima na kuupoteza!"
Wakati huo huo, Bi Kobe, aliyekuwa katika chumba cha jirani na aliyesikia maneno ya Nguruwe, akachomoza kichwa mlangoni na kusema, "Nguruwe alichukua kinoo chako wakati haupo!"
Kisha Kobe akamwambia Nguruwe, "Kwanza rudisha kinoo changu kama unataka nikulipe."
Na Nguruwe akarudi mahali alipokuwa amekificha kinoo, akakuta kimetoweka. Akatafuta kila mahali lakini hakuweza kukipata.
Nguruwe alikuwa na huzuni nyingi aliporudi kibandani kwa Kobe na kusema, "Lazima mtu amekiiba kinoo. Nilikuwa nimekificha nyasini, lakini hakipo tena. Kwa njia fulani ya kimafumbo kimetoweka, na siwezi kukipata."
Kobe aliposikia hivyo, akamwambia Nguruwe, "Usidhani hata kidogo kwamba unaweza kupata malipo ya mkufu wako kabla hujarudisha kinoo changu!"
Nguruwe bado anakitafuta kinoo. Ana hamu kubwa mno ya kukipata hivi kwamba amewafundisha hata watoto wake kufukua ardhi.